濃郁鮮甜！4間番茄湯底餐廳推介

番茄湯底酸酸甜甜夠晒開胃，唔少開飯仔囡們都係茄湯嘅擁躉，坊間亦有好多以番茄湯作招徠嘅餐廳，今次開飯仔一於介紹四間畀大家。而且番茄含有茄紅素、類胡蘿蔔素及維他命C等營養，抗疫期間食多啲又可以增強免疫力呢！

番茄清湯冷麵 蕃茄仔

銅鑼灣開業無耐嘅番茄湯專門店。呢間餐廳係柴灣滑蛋仔嘅姊妹店，番茄濃湯每日新鮮熬製，湯底食得出粒粒番茄蓉。配料方面都有十款選擇，最受歡迎包括牛魔王雙拼及特級安格斯牛肩胛，另外仲有烤厚鰻魚及炭烤風味雞扒，麵底想食特別啲可以揀葛絲或和風白麵。另外餐廳仲有供應秘製黃金蕃茄清湯冷麵，冷麵已附有慢煮雞胸絲、昆布、胡麻及柚子胡椒等材料，夏日炎炎食就啱晒！

荃灣番茄沾麵 麵屋福

番茄除咗做湯底，用嚟整日式沾麵都一樣得！荃灣呢間日式沾麵小店，主打三款招牌沾麵。當中有一款係香港較少見嘅蕃茄紅油沾麵，蕃茄味足超濃帶淡淡酸味，仲有微辣感，醒胃又惹味。麵條粗身有咬口，掛湯力都唔錯～仲可以自行追加半熟蛋及肩胛肉叉燒等配料。

人氣茄湯 番茄師兄

位於深水埗嘅人氣番茄湯專門店，早幾個月已經進駐元朗開分店，所以話真材實料的話，於「疫」市中突出重圍係無問題㗎！同樣主打番茄濃湯麵，湯底用上新鮮番茄熬煮，不加味精，飲得出番茄嘅鮮甜。推介人氣菜單「犇犇有禮」，一碗入面有牛面頰、牛坑腩及崩沙腩，三個部位都好軟腍又有牛味，牛魔王要試吓佢。

60斤蔬菜熬煮湯底 Tomato Story

主打番茄菜式嘅餐廳，選擇較多元化，除咗番茄湯系列，仲有番茄焗飯、番茄意粉及咖哩蕃茄飯系列等。番茄湯每日用60斤蔬菜熬煮，甜味更突出。必試菜式包括中東風味油封鴨腿蕃茄湯通粉、蕃茄龍蝦汁野菌天使麵、咖哩牛腩蕃茄飯及蕃茄「特」切厚切豬扒焗飯，啖啖都係茄香。

文: Yanica