Yahoo奇摩新聞 《Mean傾》田蕊妮冇諗過做演員 原來因為咁先去參加歌唱比賽？
越嚟越多無綫藝人選擇離巢往外闖，有啲轉戰內地市場繼續拍劇，有啲就轉型做KOL，甚至係投身其他行業。Yahoo TV自家製娛樂節目《Mean傾》，最新一集就邀請田蕊妮及袁彌明作客，一個係視后，一個係港姐，但佢哋都先後離開無綫。佢哋原來細個嘅時候都冇諗過做演員同選港姐，不過就無心插柳咁入咗行。
田蕊妮就話自己由細到大都冇「我的志願」，而唱歌一直只係佢嘅興趣。當時田爸爸覺得佢唱歌好好聽，於是鼓勵佢參加歌唱比賽，當時佢唔想去，因為覺得好丟架。田爸爸就開出條件同佢交換，話如果田蕊妮奪得比賽冠軍，佢就會戒煙。15歲嘅田蕊妮就去參加亞視《未來偶像爭霸戰》，結果憑贏得未來偶像金獎而入行，田爸爸亦冇喺佢面前食煙。田蕊妮16歲入行後，喺亞視及無綫時期都係主力演戲為主，演技獲得大眾認同，更憑劇集《巨輪》「倀雞英」一角，升呢成為視后。田蕊妮就話由細到大都冇諗過做演員，「演員」呢兩個字從來冇喺佢腦海出現過，結果自己就做咗演員。田蕊妮成為演員後，亦冇諗過自己會唱歌，結果就出咗兩張唱片。
至於袁彌明，佢就話自己成世都係想做生意，所以喺參選港姐填我的志願，佢都係話想成為企業家。另外，節目中亦提到袁彌明拍枱離開無綫後，由做KOL開網店去到開實體店，之後仲做埋上巿公司老闆，袁彌明就認為條路係要咁樣行，因為要有知名度，網店生意先容易成功。
學節目一開頭話齋：「每一步係冇得設計，煮到嚟你就食，條路點行睇唔清，你都要逐步行」，所以人生真係冇得計㗎！
