香港年輕人有移民念頭 過來人蔣雅文籲豁達面對：我而家銀行得返幾萬蚊...

現年37歲嘅蔣雅文（Mandy）喺2008年突然放低香港一切，移居台灣生活，蔣雅文09年同朋友合資開設咖啡店及服飾店，之後創立自家服飾品牌，又開設小店售賣酒釀湯圓，瓣數多多。Mandy之後仲喺台灣遇到台籍設計師朱經雄，15年仲拉埋天窗。唔少年輕人見到Mandy嘅生活，再加上最近香港政治環境，令佢哋更加有移民嘅念頭。

唔少網民都留言問Mandy一啲台灣生活問題，甚至係移民問題，有人問Mandy想移民但又驚放棄依家份工，前路茫茫，Mandy認為「愛」與「離開」之間嘅關係唔係絕對，佢認為就像愛一個人仍然可以選擇分開 。又有一位網民講到「每日返工返到似行屍走肉咁, 好沉悶，但又要為生活儲錢，所以要繼續做」。Mandy就話「我而家銀行得返幾萬蚊，但仲有心情喺度同大家吹，錢呢啲嘢真係仆街嚟，有時窮到一個位反而變得豁達，賤命一條你有種就拎去，建議都係set個期限畀自己，就好似我畀台北嗰8年，無論結果係賺定蝕都要適時抽身。」

另外，亦有網民問Mandy點解關閉台北分店，佢就話爸爸因為太忙而引致腰患發作，媽媽都搓湯圓，搓到手腕筋膜發炎，所以Mandy決定搬回花蓮店，佢更話「賺錢重要，但父母的身體更重要。」