Yahoo奇摩新聞 限聚令縮減至兩人 網民：有無諗過鄧兆尊感受
香港第三波新冠肺炎疫情嚴峻，政府喺噚日公布新一輪防疫措施，例如強制戶外戴口罩、食肆全日禁止堂食，而當中嘅限聚令更由4人縮減至2人，減少外出嘅機會。如果係一對情侶喺街上係唔會犯法，但係如果情侶唔係一對對咁就有啲難度喇！新限聚令一出即刻有網民關心被封「現代韋小寶」嘅鄧兆尊嘅情況：「限聚令兩人，有無諗過鄧兆尊感受？」
咁又係嘅，鄧兆尊最出名就係佢有三名紅顏知己，分別係大婆Carmen、二房Cherry（車厘子）同新歡L小姐。過往間唔中都被傳媒影到佢哋一齊出去食飯，鄧兆尊嘅三位紅顏知己可以和睦共處。雖然政府話同住家人可獲豁免，不過鄧兆尊嘅三位紅顏知己分別住喺灣仔不同地方，睇嚟喺限聚令下佢哋都冇機會一齊外出㗎啦！
有傳媒就問鄧兆尊無得一拖三點算？鄧兆尊話喺限聚令下經常留喺屋企，多謝大家關心。之後鄧兆尊被問到最近有冇一拖三外出，鄧兆尊就話冇，呢個時間多數自己戴住口罩喺街行，因為女仔比較緊張疫情。喺全日禁堂食後，鄧兆尊都係打算買外賣或者叫工人姐姐煮飯。
唔少網民都好關心鄧兆尊，紛紛喺社交網站留言，例如：「終於到左（咗）抉擇既（嘅）時候」、「家變喇 家變喇」、「終於可以大條道理一拖一，唔使次次一拖三啊」、「佢先係限聚令下ge受害者」及「鄧兆尊或成最大輸家」等等。
