【醫療保羅生門】林作轉做保險被投訴行為態度有問題：不尊重客人

近排新聞多多嘅林作，繼早前同裕美嘅新聞炒得熱騰騰，噚晚林作又上娛樂新聞，今次終於唔係講佢嘅感情，而係關於佢嘅工作。林作已投身保險行業，短短幾個月就已經做到有聲有色，不過有傳媒接到讀者投訴指林作嘅行為同態度有問題，林作仲出言恐嚇。

報道指該名讀者知道林作做保險後，於是就約佢出嚟了解醫療計劃，林作叫佢買儲蓄危疾，但佢本身已經有一份，而家想買份實報實銷嘅醫療保。林作聽到後態度就180度轉變，唔理佢又自己玩平板電腦，讀者見佢咁嘅態度就話再考慮吓。之後，讀者就喺社交網上發佈咗佢對林作嘅感受及評價，例如「但總是離不開帶點二世祖的傲氣，見客態度有待改進，還是不夠貼地，見緊我仲喺度用iPad整其他嘢，不太尊重客人，暫時5/10分……就算你牛津咩咩咩都好，都不可以太過串（寸），係要需要更加謙虛。」

讀者發佈後，竟然收到林作嘅恐嚇，好似「我不會放過你」、「等收律師信。你不賠償跪下來道歉我不會停手」、「我會持續搞你」及「我會斷你米路」等等。林作更要求佢出道歉post，否則會採取法律行動。事實上佢哋喺通訊軟件嘅對話中，該名讀者已經有向林作道歉話「如果我得罪你，好。我道歉，對不起」。

噚晚，林作喺社交網站亦有PO出呢位朋友嘅道歉聲明，並留言話：「嚴正聲明：此網民在近日不斷騷擾本人兩位下線後，進而在 WhatsApp 及社交媒體不斷滋擾本人。經過警告後該疑似精神病患者曾經刊出正式道歉，但此後斷章取義將兩人對話吿向媒體甚至監管部門。由於該人士曾經在其公開帳戶公開散播關於本人不實言論足以構成誹謗，本人已經將事情交給律師處理，將會在近期提出控告，以正視聽。近日，媒體可能會報導此事。除了將新聞在此分享給各位讓大家評評理外，由於事件將會進入法律程序，本人不會再回應。我相信本人對得起本人僅僅幾個月累積的大概50位客戶。我也相信，會有我的客戶選擇站出來維護本人。#林作保險，只會越做越大、越做越好。招人嫉妒，應該的。」

另外，林作仲開PO留言話：「你明....嗰個人約咗我下線然後我下線覺得唔對路，搞到我要去幫拖，一坐低發覺精神有問題，唯有靜靜地聽佢講埋啲嘢，自己處理自己客戶嘢。佢約我地出黎，但完全唔肯講保險，要講八卦嘢，然後前言不對後語，水我地，我地全程冇鬧佢真心仁至義盡 #林作保險 #放馬過來」