氣質女神都上過《Yes!》蘇皓兒/鄧麗欣/蔡卓妍/張栢芝...估唔到仲有佢!

《Yes!》雜誌絕對係80同90後嘅學生回憶,想當年唔少同學仔偷偷帶返學校睇,當中嘅「校園投訴組」、「Miss Sex熱線」、「華少」、「少年古域」、「全港校花校草選舉」及「城市驚喜」更係深受大家歡迎。當時嘅「全港校花校草選舉」及「城市驚喜」成功令到唔少校花校草及少女一舉成名,更因此踏上星途。而家就同大家睇下有邊啲女星曾經參選過《Yes!》校花同上過「城市驚喜」啦!

鄧麗欣

鄧麗欣(Stephy)喺2000年參加「全港校花校草選舉」,獲得冠軍,之後被唱片公司發掘,成為組合Cookies嘅隊長。除咗歌唱事業之外,Stephy亦有參與唔少電影拍攝,例如《九個女仔一隻鬼》、《獨家試愛》、《十分‧愛》及《我的最愛》等等。近年,Stephy仲憑《空手道》獲得香港電影金像獎嘅最佳女主角提名及奪得香港電影評論大獎最佳女演員,今年亦憑《金都》再次提名最佳女主角。

鄧麗欣
鄧麗欣

蘇皓兒

蘇皓兒(Chole)喺08年參加校花校草選舉,之後以模特兒身份出道,20歲成為女子組合As One成員之一,係新一代氣質女神。蘇皓兒今年喺無綫劇《那些我愛過的人》飾演林文龍女兒姜子優,雖然Chloe已經26歲,不過飾演中學生仍然青春逼人,加上喺劇中有不俗嘅表現,成功獲得網民關注,人氣急升。

蘇皓兒
蘇皓兒

江嘉敏

江嘉敏(Kaman)喺2011年參加校花校草選舉,雖然最後選擇退選,不過佢依然成功加入娛樂圈。2017年江嘉敏喺劇集《親親我好媽》中飾演學生妹Venus,因表現亮眼及清純形象,人氣急升。現時Kaman已經係無綫力捧小花之一,喺唔少劇集擔任主要角色。

江嘉敏
江嘉敏

林穎彤

林穎彤(Bella)雖然係童星出身,不過佢喺14歲嗰時參加校花校草選舉,更獲得甜美校花獎及才藝大獎。林穎彤2007年拍攝有線劇集《補習天后》正式出道,2009年參加無綫與商台合辦嘅《十人巷》,勝出後加入無綫成為旗下藝人。Bella口齒伶俐,除咗擔任唔少節目嘅主持之外,仲有拍攝劇集,當中憑《城寨英雄》中飾演悲劇少女鑫鑫,成功獲得關注,更成為宅男女神。喺2017年,Bella加盟星夢娛樂,上年更以歌手身分出道,成為多棲藝人。

林穎彤
林穎彤

蔡卓妍

蔡卓妍(阿Sa)有少少baby fat,喺未出道時曾經登上「城市驚喜」,當時已經獲得唔少人關注。喺2000年,阿Sa參與港台青春劇《青春@Y2K》為人熟悉,阿Sa之後簽約英皇成為旗下藝人。2001年與阿嬌組成Twins,一炮而紅嘅佢哋深受年青人歡迎,有唔少深入民心嘅經典歌曲。阿Sa除咗歌唱事業之外,亦有參與唔少電影拍攝,例如《常在我心》、《我老婆唔夠秤》、《千機變》、《戲王之王》及《雛妓》等等,演技越嚟越進步,先後3次獲得香港電影金像獎最佳女主角提名。

蔡卓妍
蔡卓妍

張栢芝

張柏芝同樣喺未出道就登上「城市驚喜」,當年柏芝眉清目秀,係唔少少男心目中嘅女神。之後,柏芝接拍檸檬茶廣告,廣告出街後隨即爆紅。張柏芝1999年開始參與電影拍攝及歌唱事業,電影《喜劇之王》更奠定女主角嘅地位及首張EP《任何天氣》大受歡迎,風頭一時無兩。張柏芝現時已經係三子之母,不過樣貌同身材都同年輕時冇咩分別。

張栢芝
張栢芝

梁洛施

梁洛施(Isabella)身形高挑,憑住標緻五官喺13歲時就被「城市驚喜」睇中,更登上封面。梁洛施15歲加入英皇娛樂,獲得力捧嘅佢參與唔少電影拍攝,例如《見鬼10》、《蟲不知》、《情癲大聖》及《伊莎貝拉》等等。19歲嘅Isabella原本星途一片光明,不過佢喺呢個時候為李澤楷未婚生子,更為他育有三子,不過Isabella最後冇嫁入豪門,獨自撫養3個仔仔。

梁洛施
梁洛施

徐子淇

徐子淇(Cathy)喺未做模特兒前就已經登上「城市驚喜」,雖然有少少baby fat,不過依然非常省鏡。徐子淇入行後雖然影視作品不多,不過就幾乎全香港人都識佢,因為佢嫁入豪門,成為「千憶新抱」。

徐子淇
徐子淇

其實除咗以上女星之外,陳自瑤、官恩娜、唐寧、蔣雅文、蔚雨芯、馬賽、陳靜、賈曉晨、裕美,李彩華及楊愛瑾等等,都有參與過校花校草選舉或登上過城市驚喜。