《殺手》林景程飾演細膽懦弱殺手學徒獲觀眾讚賞:帶嚟喜劇效果
無綫劇集《殺手》正在熱播中,「御用專業人士」林景程(King)喺日前登場,不過佢今次唔係做專業人士,而係飾演細膽又懦弱嘅殺手學徒小秉。前晚劇情就講到小秉唔想再係一個廢人,所以就拜Dark Angel(龔嘉欣飾)為師,成為殺手學徒。因為Dark Angel要去完成任務,所以將小秉交俾閻武(黎耀祥飾)兩星期。期間閻武要佢去跟蹤阿之(麥明詩飾),不過佢就跟蹤得好水皮,失明嘅阿之都知道被跟蹤三日。唔少觀眾睇過林景程嘅演出後,認為佢做得唔錯同好好笑,成功帶嚟唔少喜劇效果。
林景程接受傳媒訪問時,就話原本以為喺劇入面好多打鬥場面,不過自己手腳唔太協調,同埋啲筋骨又硬,好擔心會打得唔好睇,所以拍之前都有同劇組練習,自己亦再練習動作。林景程睇完劇本後,知道動作場面唔多,都鬆咗一口氣。另外,林景程仲話好鍾意呢個角色,雖然戲份唔算多,不過角色性格好鮮明,劇本亦寫得角色好得意同好有喜感。
林景程現年36歲,畢業於香港理工大學物理治療系,喺07年參加過英皇新秀歌唱比賽,兩年後參加《超級巨聲》而入行。入行11年嘅林景程,喺2012年開始拍劇,不過都係飾演配角為主,例如《On Call 36小時》明太子、《四個女仔三個BAR》Lincoln、《超能老豆》施興、《三個女人一個「因」》白保運、《是咁的,法官閣下》Brandon及《好日子》崔志華等等。
林景程除咗係演員之外,佢仲係物理治療師,現時兼顧兩邊嘅工作。因為熱愛演戲嘅關係,即使好辛苦都冇選擇放棄。林景程仲話試過放工沖完涼,就要返去物理治療,雖然好攰但都會盡量安排好時間。