【極速上位】陳曉華《迷網》孭飛做女二 新劇仲會擔正女一

近年無綫鬧演員荒，唔少小生花旦都選擇離巢向外闖，好彩嘅係仲有一班參選港姐而入行嘅小花，而無綫當然亦盡快培養佢哋接棒上位。陳曉華（Hera）喺2018年參選港姐，憑住高挑身型及甜美樣貌，陳曉華先後獲得《2018年度香港小姐競選》冠軍、「我最喜愛佳麗獎」及《2019年國際中華小姐競選》冠軍。自港姐奪冠後，Hera立即簽約成為無綫「 親生女 」，隨即備受無綫力捧。

陳曉華出道日子短，已經劇接劇咁先後接拍咗《迷網》、《食腦喪B》、《七公主》及《異搜店》四部劇集，而處女作《迷網》就喺啱啱星期一首播，孭飛做女二嘅陳曉華喺劇中飾演網絡科技調查組見習督察蕭美婷Denise，專門打擊各種科網騙案，同楊明飾演嘅司徒忠係上司下屬關係。另外，佢仲會同高海寧爭奪楊明。唔少網民睇過Hera嘅演出後，紛紛都話Hera仲有好多地方需要改善，不過都話第一次拍劇會體諒，同繼續支持佢。

Hera話第一次拍劇非常緊張，搞到不停NG，不過同事對佢好好，會安慰同支持佢。Hera近排又開拍新劇《異搜店》，佢喺劇中會擔正做女主角，同何廣沛同坤哥合作，極速上位，真係好犀利呀！