岑杏賢曾患甲狀腺亢進症肥腫難分 靠呢樣樂觀面對

岑杏賢（Jennifer）現年31歲喺2012年參選港姐後入行，入行8年主要做主持及拍劇，而較為人熟識嘅係《愛·回家之開心速遞》中KC（歐瑞偉飾）女友Icy。

岑杏賢被人嘅感覺係好樂觀又愛笑，但其實佢曾經患有甲狀腺亢進症， 一炆憎就會復發，所以要經常保持心境開朗。岑杏賢喺讀大學嗰陣，因功課壓力而患上甲狀腺亢進症，手震眼凸頸粗頭暈。 本來一直控制住，點知5年前復發，當時醫生開咗藥一日要食8粒，佢食咗一個月發覺成個人腫得好緊要，連佢媽咪都睇得出有問題， 亦有報道話佢肥。之後，好彩陳法蓉介紹醫生俾佢，發現之前服用藥物過量，之後藥物由八粒改吃兩粒，後來更改用自然療法，慢慢康復。

甲狀腺亢進症呢個病冇得斷尾，如果食得太多碘或者情緒波動都會有機會復發，所以Jennifer經常保持心境開朗，樂觀正面去面對每一日。Jennifer都好多謝身邊有好多人鍚佢，好似黎諾懿同太太會帶佢去見醫師針灸，而何基佑拍《明珠生活》時又相當照顧佢。