【劇透】《殺手》重要角色將陸續慘死 唔止謝東閔係殺手獵人仲有佢？！

無綫劇集《殺手》接近尾聲，劇情開始愈來愈緊張，本來佛爺（李成昌飾）死咗以為天下太平啦，點知經理人鐵仁（歐瑞偉飾）無辜被殺，之後清道夫森森（高海寧飾）嘅拍檔阿蕃（易智遠飾）亦被殺死，好彩當時森森手持鐵剷掙扎，否則佢都會死。

雖然森森認唔到邊個係「殺手獵人」，但網民話睇身形同對眼已認到係Parker（謝東閔飾），而噚晚預告終於露出「殺手獵人」嘅真身啦！黑化嘅Parker愈來愈兇殘，多個重要角色將會陸續遇害，好似蘇菲亞（羅蘭飾）同小秉（林景程飾）都將會被殺。Parker捉走Cash（李佳芯飾）嚟威脅Zero（陳豪飾），另外，因為佢之前殺佛爺失敗，所以又想搵Dark Angel（龔嘉欣飾）報仇。由於小秉就係無辜被殺，閻武（黎耀祥飾）將會狂操自己，操到六舊朱古力腹肌，返到當日殺手之王嘅狀態幫小秉報仇。

不過噚晚預告蘇菲亞（羅蘭飾）指「殺手獵人」唔只一個，喺網上亦流傳殺手獵人組織名單，當中包括Parker、閻素之（麥明詩飾）及殺手獵人經理人淑嫻（江美儀飾）。相信大家都有好多疑問，例如阿之係點殺人，而佢係咪想搵老豆閻武報復，同埋淑嫻又捨唔捨得殺閻武等等。如果大家想知嘅話，就記得睇埋落去啦！