《女人必學100道菜》三姐蕭秀香與江美儀主持 網民嫌少交流：無火花

江美儀同名廚蕭秀香（三姐）主持嘅烹飪節目《女人必學100道菜》今個星期開始播映，25集節目會教大家煮100道菜，仲話學識煮佢哋教嘅餸菜就一定嫁得出。雖然有網民認為搵現時單身嘅江美儀做主持唔夠說服力，不過三姐所教嘅菜式都幾有創意。

一班平時冇睇開無綫午間節目《流行都市》嘅觀眾，可能對三姐蕭秀香唔係太熟悉。有「香港女廚王」之稱嘅三姐蕭秀香，平時除咗喺《流行都市》教煮餸外，佢仲喺將軍澳開設海鮮酒家。三姐細細個已經跟爸爸入廚房, 後來爸爸過身後，三姐做過好多唔同嘅工。最後三姐頂手一家海鮮酒家，就算間鋪位置好偏僻，都仍然好多客人山長水遠去幫襯，獲得好好嘅口碑。不過喺肺炎疫情下，三姐酒家嘅生意都大受影響，試過晚市一位客人都冇，全日只係得650蚊生意額。雖然要出動10萬蚊私己錢救亡，不過三姐好樂觀面對，仲話只要伙記有糧出同有工開，就算要攞私己錢出嚟都唔會介意。而今次第三波疫情，三姐為咗保障客人同伙計嘅安全、酒家嘅聲譽，佢已經暫停晚市，只係做中午外賣。

唔少網民認為三姐同江美儀喺節目上好少交流，好似只係想快手快腳煮好啲餸，話睇唔到佢哋之間有火花。相反，三姐同安德尊（大王）拍攝《流行都市》時經常互窒頂嘴，為節目帶來唔少火花，唔少觀眾都鍾意睇佢哋做節目。大王仲講笑話同三姐嘅關係好差，三姐煮嘢好難搞，點頭點尾。仲話因為係三姐咋，如果唔係佢火都嚟。之後大王仲爆三姐脾氣火爆，仲話好驚佢，唔可以得罪佢。