Yahoo奇摩新聞 【電影LOL】高層揞一年人工出糧保下屬 荷李活金牌經理人公司撐唔住裁員止血
新冠病毒重創荷里活！一眾大片廠製作嚴重滯後，完成品又上映無期，無收入唯有減成本。因為拍攝進度停擺，連經紀公司都開始頂唔住，美國荷里活大型經紀公司CAA（Creative Artists Agency）日前宣佈裁員，裁走多達90位經理人，超過250名後勤員工要放無薪假。
CAA旗下簽約明星由運動員、歌手、導演、編劇至演員都有，喺美國係最大牌經紀公司。旗下演員粒粒巨星，包括畢彼特、梅麗史翠普、Reese Witherspoon、新一代「豹女」Kristen Wiig等，堪稱巨星之家！
要照顧咁多藝人，都要有返咁上下數量嘅經理人同助手，佢地職能唔止跟出跟入，一個好嘅經理人首要係會幫你爭取最好嘅利益，荷里活一線片酬講緊最少幾千萬美元上落，做得巨星經理人都要有返咁上下財技、法律知識同人際手腕，本身都係人才，好值錢下，加上知道唔少行內商業秘密，公司免得過都唔會輕易放班經理人走。
其實CAA對手公司WME、UTA等3月中已經開始裁員，佢地算有良心，4月時宣佈全公司共同進退，減薪留職，高層們Richard Lovett、Bryan Lourd同Kevin Huvane放棄自己一年人工，用嚟出糧俾其他員工。可惜因為疫情嚴峻，終於支持唔住要裁員！
不過講明遣散費賠足，至少舊錢夠員工頂到10月。其餘放無薪假放到9月30日，停薪期間CAA會繼續幫員工供醫療保險，希望藉此減低損失，捱過今個財政年度唔駛再裁員。
雖然裁員、停薪留職對員工嚟講都唔係咩好消息，但咁嘅時勢下，老細肯唔收人工以「瘦上保下」，都叫盡咗力。有良心，難怪咁多星都肯同佢地簽經理約。
更多電影文章
【電影LOL】美國攝製隊封城期間入武漢拍紀錄片 點解冇被官方阻撓？ 原因係……
【電影LOL】終於敲定上畫！《天能Tenet》香港8.27上映
【電影LOL】疫情推冧新片檔期 香港國際電影節取消 《阿凡達2》《星球大戰》延期一年《花木蘭》上映無期
