【電影LOL】許鞍華獲威尼斯影展頒發終身成就獎 首位華人女性導演獲嘉許

因為疫情關係,各個國際影展需要延期或取消,將於9月3至12日舉行嘅第77屆威尼斯影展,隨住歐洲疫情逐漸穩定宣布如期舉行,不過今年參展嘅作品可能比往年少,影后Cate Blanchette將擔任評委會主席。

威尼斯影展昨日率先頒發「金獅終身成就獎」予許鞍華導演,絕對係香港電影業一大喜訊!過去獲得終身成就獎嘅亞洲導演只有日本黑澤明、宮崎駿及吳宇森導演,許鞍華係首位獲得此殊榮嘅華人女導演!

許鞍華導演2011年憑《桃姐》首次入圍威尼斯影展競賽單元,最後由葉德嫻贏得最佳女主角殊榮。2014年許鞍華擔任影展評審團。影展總監Alberto Barbera表示許鞍華作為70年代港產片新浪潮重要一員,在亞洲影壇備受尊敬,40多年從影生涯拍過嘅電影類型非常廣闊,作品結合商業成功與藝術成就,亦係首批將紀錄片元素將香港風景轉化為劇情片嘅導演,透過獨特視角講出社會議題。

而另一終身成就獎得主為女星Tilda Swinton,大會總監表示其演出充滿獨特性,由藝術電影到荷里活娛樂大片都能交出亮眼表演,更係不少導演嘅繆思,為當代電影不可或缺一員。對於獲得肯定,Tilda Swinton表示將以謙卑嘅心迎接呢份殊榮,持續進步,並希望繼續參與威尼斯影展。

Tilda Swinton好大機會以第4度同鬼才導演Wes Anderson合作嘅《法蘭西諸事週報》參與今屆威尼斯影展。至於詳細威尼斯影展片單將會於7月28日公布。

更多電影文章

【電影LOL】破解Netflix內容搜尋缺點 記住呢幾組數字!

【電影LOL.煲劇分部】原版《東京愛的故事》日劇 黃VIU有得睇

【電影LOL】戲院冇新戲 上Netflix睇刺激動作片《不死軍團》

【電影LOL】台灣文化局出post明抽廣電局新指引 呢套台片一定犯晒規

【電影LOL.退票安排】戲院再次停業 一文睇晒各大院線退票安排