Yahoo奇摩新聞 【電影LOL】網傳內地廣電局又有劇本新指引 歷年來有邊啲規矩得啖笑？
近日網傳管控傳媒內容尺度嘅中國廣電局又出招，將會新增20條指引，就電視節目、劇集及電影內容等作出規管。
其實內地製作一向要過審，無批文就唔開工已經係慣例。為咗確定作品可以見街，製作團隊會先送劇本過審，由大綱到完整劇本都要俾審批。指引條文一向好多，要對照咁多條條框框睇劇本，check住有無犯禁忌，其實都幾高難度，特別係廣電局啲規定有時都幾神化！
今次新增條文就包括穿越劇要符合科學解釋同帶有正能量、歷史劇跟足正史拍，人物主線唔可以老作、架空題材又要同歷史完全無關。幾條例加埋，變相以後唔可以再拍《步步驚心》？咁Marvel《奇異博士》夠唔夠科學同正能量？指引又話拍改編劇要忠於原著，咁好似《尋秦記》呢啲有穿越又有史實，同時又係改編自黃易小說嘅電影，攞咗返內地又會點批？
仲有啲好難揣摩拿捏嘅，好似愛情劇唔可以太甜、青春劇又唔可以拍早戀及暴力、同性戀題材一定要點到即止，戀情變友情、拍遊戲改編但又唔可以突出個玩家！曾國祥導演嘅《少年的你》因為涉及校園暴力，就算未出新指引，據聞要多次修改先可以上映！新例過埋，應該連小清新嘅《匆匆那年》、《致青春》呢類電影都無得再拍。青春從此變成平淡似水？
廣電局啲指引其實係咪邊樣受歡迎就禁邊樣？韓流好勁就出咗限韓令；親子真人騷《爸爸去哪兒》受歡迎就禁咗唔俾拍。真人騷拍到泛濫咁滯，就出咗個《關於真人秀節目管理通知》，要求「主動融入社會主義核心價值」、「避免過度明星化」等等，咁大把真人秀都唔睇得喎。
以往廣電局都有唔少指引，好似2007年唔可以由香港同台灣主持人連續主持超過3集節目，又唔可以喺節目中批評國產電影。限制多多嘅關係，主旋律題材最穩陣，所以先出現大量情節離奇嘅抗日神劇，但係神劇大量湧現後，廣電局2014年又以「不可出現我軍色誘敵軍、金錢換情報」指引劇本方向。
寫個唔犯禁嘅劇本其實幾高難度，有時不得不佩服內地創作人嘅靈活性。根據《電視劇內容管理規定》同埋《中國人口與計劃生育條例》，80後嘅中國公民只能有一個細路，未婚生子屬違法嘅。文章主演嘅劇集《小爸爸》就安排男女角於美國相遇，雖然未婚產子，不過個仔喺美國出世，就無抵觸國家政策！
只面向內地市場嘅電影人，要時刻保持靈活及創意無限，仲最好收定錢……先因為指引隨時可加可減又隨時變，拍好哂都隨時無得上映，好易血本無歸！
更多電影文章
【電影LOL】今個星期睇咩戲《打噴嚏》《超能復仇》《無定向喪心老友記》《築夢奇蹟》
【電影LOL】《屍殺列車》續集《屍殺半島》下周上畫 5個你要知嘅重要訊息
