【電影LOL】終於敲定上畫!《天能Tenet》香港8.27上映

電影戲院業嘅朋友呢期心情應該似足坐過山車,時高時低又無得中途跳車!

因為全球疫情反覆嘅關係,戲院閂完又開,開完又閂,電影公司睇住個疫情數字日日估幾時先受控,新片上映日期改完又改,以為抽起唔上,點知又排到個片期出嚟!

講緊Christopher Nolan套鉅製《天能Tenet》,套戲其實改過2次片期。上星期片主華納先出公佈,《天能Tenet》未能於8月12日如期上映,會好好制定新一輪排片及宣傳計劃。點知言猶在耳,今日又宣佈《天能Tenet》將於8月26日喺全球70個地區上映,其中美國只有部份地區上映。

所謂新嘅排片模式,簡單講就係邊度戲院開門、邊度有票房,就有得上映!美國依家疫情最嚴重,如果要好似以前咁一定美國率先上映,然後先到其地國家,咁可能有排等都等唔到有期上映,電影公司要繼續燒錢!日日蝕都唔係辦法,眼見延尚昊導演嘅《屍殺半島》單喺南韓就錄得2100萬美元票房佳績,有見及此決定將《天能Tenet》轉攻美國以外市場。

華納亦唔會放過中國呢個全球第2大嘅票倉,內地戲院上星期重開,無新戲嘅情況下暫時做緊二輪放映,有啲戲院直頭上返幾年前嘅大片。首日全國放映超過6000場次,有超過7萬人入場,成績不過不失。

雖然中國不在公佈嘅上映地區名單內,不過根據Variety報導,華納積極爭取內地上映,只係暫欠批文,如果成事的話,《天能Tenet》應該成為內地自農曆年戲院停業後,首部上映嘅荷里活大片,睇勢有機會票房高開。

根據名單,《天能Tenet》8月27日會喺香港上映,不過今日唔知聽日事,特別係防疫政策朝令夕改,戲院屆時可唔可以開門做生意都成疑問,而且《天能Tenet》話上話上都改咗3次期,點知會唔會再改先?

更多電影文章

【電影LOL】疫情推冧新片檔期 香港國際電影節取消 《阿凡達2》《星球大戰》延期一年《花木蘭》上映無期

【電影LOL.地道周末影院】許鞍華《天水圍的日與夜》無劇情嘅劇情片 唔悲哀嘅悲情城市

【電影LOL】許鞍華獲威尼斯影展頒發終身成就獎 首位華人女性導演獲嘉許

【電影LOL】破解Netflix內容搜尋缺點 記住呢幾組數字!

【電影LOL.退票安排】戲院再次停業 一文睇晒各大院線退票安排