【電影LOL】疫情之下Netflix最多人睇嘅係呢套10年前舊片?!

而家全球受疫情影響,唔少戲院都要閂門,喺屋企睇串流平台節目成為唔少人安坐家中最方便嘅娛樂。以往可以睇每周票房榜留意影壇走勢,而家想知邊套戲多人睇,就要望望串流平台嘅點擊榜嘞。

根據Netflix公布嘅收視十大,都可以睇到唔少用戶嘅選擇取向。原來新片未穩贏,本周冠軍就係一套上畫10年嘅舊片!即刻數榜~

第10位-《憤怒鳥大電影2》

第9位-《醉爆伴郎團》

第8位- Love Wedding Repeat 

Netflix發行嘅英國電影,屬於外國常見嘅浪漫小品feel good movie。故事講阿哥為令阿妹嘅婚禮順利舉行,要拆掂各式麻煩人,包括前女友、不請自來嘅賓客等等。輕輕鬆鬆個半鐘,食飯睇啱晒!

第7位-《神風終極戰士》

2010年作品,導演係《鬼眼》、《異能仨》嘅Night Shyamalan。電影全球票房收3億幾,但係口碑麻麻,甚至成為爛片大獎「金草莓」大贏家。點解咁多人睇?因為呢個故事本身係Nickelodeon兒童頻道嘅受歡迎動畫,最近Netflix會推出新版,觀眾順手搵返呢套電影版睇啩。

第6位-Sergio

亦係Netflix出品嘅新片,講述聯合國外交官Sergio,處理埋喺巴格達嘅最後任務就打算辭職,但係遇著聯合國總部炸彈爆炸……緊張刺激動作片,幾時都有市場嘅。

第5位-《白宮淪陷3:天使淪陷》

第4位-Earth and Blood

又係Netflix發行,又係動作片。故事好簡單,同個女相依為命嘅爸爸,無端捲入毒品風波,於是要帶住個女走佬保命。片長80分鐘,理應好緊湊,但係觀乎影評口碑似乎麻麻喎。

第3位-《青蜂俠》

無錯,係周杰倫做嗰套!

第2位-Code 8

去年上映嘅加拿大獨立電影,製作人係上網眾籌搵成本開戲!擁有超能力嘅青年,因為要為患病阿媽搵醫藥費,所以決定鋌而走險。

第1位-《壞蛋掌門人》

雖然係舊片,但係最近先喺Netflix上架,加上小朋友停課,家長點都要播吓呢類片(俾自己回氣)。所以點解《壞蛋掌門人》同《憤怒鳥大電影2》上榜?因為細路大晒囉。

更多電影文章

【電影LOL】新串流平台Quibi玩短小精悍 起朵之作玩吹氣公仔?!

【電影LOL.外語930】《茱莉對茱莉亞-隔代廚神》只要有心 人人都可以係食神

【電影LOL】迪士尼翻拍停不了 搵「Elton John」拍新版《羅賓漢》

【電影LOL】內地翻拍《五個撲水的少年》 角色設定改到面目全非

【電影LOL.煲劇抗疫】唐詩詠大讚!韓劇《夫妻的世界》大婆復仇無得輸