【電影LOL】湯告魯斯密謀坐SpaceX上太空拍戲 爭做荷里活升空第一人

日前由Elon Musk創辦嘅航天公司Space X成功將兩名太空人送到國際太空站,成為首間載人到太空嘅私人公司,嚟緊有機會將到太空嘅旅程商業化,未來坐火箭會唔會同坐飛機一樣咁容易?

不過可以肯定坐火箭唔再如以往般得NASA先可以做到,除咗上太空站做研究,仲可以去拍戲!荷里活影星湯告魯斯近年拍埋唔少動作片,雖然已經57歲,不過拍危險動作場面一樣無有怕,唔用替身次次都親身上陣,因為佢深明觀眾入場就係睇佢身陷危難之中。咁搏命,抵佢嘅《職業特工隊》系列拍極仲有,仲部部收得!

可惜,受新冠病毒疫情影響,《職業特工隊7》拍攝嚴重受阻,上映日期被逼延後,佢手上其他電影項目好似《壯志凌雲》續集都一齊要延期,因為拍攝進度大亂,連帶影響埋佢上太空拍戲嘅計劃!

早於Space X架火箭上太空之前,湯告魯斯已經放哂風會同Space X合作,會親身到太空站拍攝,挑戰荷里活影星紀錄。雖然未有電影公司落實投資,仍然無阻湯告魯斯積極籌備,今日連導演人選都有埋,電影將會交予由《異空戰士》已經合作過嘅導演Doug Liman負責,據聞Doug仲會寫埋劇本,兼同湯告魯斯一齊監制呢套首部於太空拍攝嘅電影。

荷里活都拍咗唔少以太空或太空人為背景嘅電影,好似Matt Damon主演嘅《火星任務》、Ryan Gosling主演嘅《登月第一人》。次次拍親升空電影,NASA都會擔任顧問,單係2017年,太空總署就已經為143套紀錄片、25套電影及41部電視節目提供專業指導。今次湯告魯斯親身上陣,相信NASA會更俾力協助。

去到無重狀態拍攝咁高難度,當然無可能喺太空拍哂成套至少90分鐘嘅電影。上太空拍攝咁大件事,點都要接受一定訓練,湯告魯斯keep得再fit都有返咁上下年紀,坐火箭去太空拍戲簡直係搵命搏,最後就算成品只係得1分鐘片段喺太空拍攝都已經夠哂噱頭!暫時電影仲未有投資者,相信無咁快可以落實拍攝,希望湯告魯斯屆時仲夠fit上太空啦!

更多電影文章

【電影LOL.煲劇部】「犯法就係犯法」《時效警察》專查無得問責過期舊案

【電影LOL】今個星期睇咩戲 《叔.叔》《墮落花》《誠實選舉媽》《罪惡島》

【電影LOL】韓劇最強綠葉擔正喜劇片《誠實選舉媽》寸爆無恥政客

【電影LOL】下年奧斯卡改規則轉形式 務求有獎頒

【電影LOL】青春愛情片《律政俏佳人》18年後再拍新一集 仲可以點玩?