【電影LOL】戲院冇新戲上Netflix睇刺激動作片《不死軍團》

戲院重開無耐,觀眾入場意欲高返少少,港產片《幻愛》因為好口碑錄得超過8百萬票房,本來今個星期仲可以睇韓港同步上映嘅《屍殺半島》,可惜因為疫情反覆,娛樂場所再次要停業。留在家中抗疫嘅各位,相信需要娛樂節目,串流平台係最經濟嘅選擇。

龍頭大哥Netflix剛剛推出由《末日戰車》Charlize Theron及《被奪走的12年》Chiwetel Ejiofor主演動作片《不死軍團》。電影改編自Greg Rucka同名圖像小說,一推出旋即登上觀看榜No. 1,時代雜誌形容《不死軍團》係今個夏天最好睇嘅動作片,爛蕃茄網亦錄得82%新鮮度,評價不俗。

《不死軍團》講述以Andy(Charlize Theron飾)為首四位長生不死的戰士,數個世紀以來一直在暗中保護人類。他們剛發現一位擁有相同能力的新夥伴Nile(Kiki Layne 飾),多年來隱性埋名,一次意外暴露咗超能力,而被覬覦這份神奇力量的惡人盯上。戲內交代不死軍團歷年上陣殺敵,由古時埋身肉搏打到今日槍林彈雨,動作連場非常刺激!

不死軍團擁有驚人嘅自癒能力︰生存超過6000年嘅Andy練出一副好身手,幾乎識哂世界所有格鬥技巧!為咗造就女戰神,劇組特別搵嚟《殺神》嘅武指Danny Hernandez負責動作指導。Charlize Theron為角色瘋狂操練4個月,拳擊、槍法、騎馬樣樣要學,練出鋼鐵身型,敬業嘅佢就算因為動作難度高而受傷,忍痛繼續拍埋去!

同其他動作英雄唔同,《不死軍團》無機關槍狂掃都唔中彈嘅光環,算係「最傷痕纍纍」嘅超能力英雄角色。不過因為有自癒能力,身中多槍倒地,好快又可以無事起返身,但係不死身都有極限,Andy就中招嘞!點解?唔劇透啦~

片尾仲埋下彩蛋,安排幾百年前被困海底嘅不死軍團之一Quynh(Van Veronica Ngo飾)重現人間!女主角兼監制Charlize Theron就講明特意埋下Quynh做伏筆,有意將《不死軍團》發展成3部曲,不過拍唔拍得成就睇觀眾反應,所以想睇多啲Andy嘅身世,就要靠觀眾捧場谷多啲view數拍續集解畫啦!

更多電影文章

【電影LOL】台灣文化局出post明抽廣電局新指引 呢套台片一定犯晒規

【電影LOL.退票安排】戲院再次停業 一文睇晒各大院線退票安排

【電影LOL】網傳內地廣電局又有劇本新指引 歷年來有邊啲規矩得啖笑?

【電影LOL.外語930】時光這個壞人《我的父親母親》

【電影LOL】《屍殺列車》續集《屍殺半島》下周上畫 5個你要知嘅重要訊息