Yahoo奇摩新聞 【電影LOL】青春愛情片《律政俏佳人》18年後再拍新一集 仲可以點玩？
仲有無人記得Reese Witherspoon未做影后之前，拍落唔少愛情喜劇？對比佢而家做埋製作人，親自監製兼演出劇集The Morning Show，又有同Nichole Kidman、梅姨鬥戲嘅Big Little Lies，拍親都係正劇偏多，都有幾分懷念佢以前同Tom Hardy、Chris Pine拍埋啲無咩劇情得啖笑嘅《爭女特務王》。當然最令人回味一定係戲謔金髮女子有身材無智商嘅《律政俏佳人》（Legally Blonde)!
2001年推出嘅《律政俏佳人》不經不覺已經面世近20年，好多觀眾當時分分鐘未出世，睇電視睇碟上網streaming先睇過！當時千禧年前後有大量同類型feel good電影，主角嘅人生最大挫折就係被仔飛，除咗令前男友回心轉意之外又無其他人生目標，《律政俏佳人》嘅故事亦建基於此展開！女大學生Elle Woods（Reese Witherspoon 飾）金髮、好身材、極注重打扮，基本上由頭到腳粉紅色，仲去邊都帶住隻芝娃娃，因為有外表，所以無需要亦無被要求要用腦！
一心諗住哈佛男友會求婚，結果被嫌無腦，只宜have fun不宜結婚而被飛，人生除咗扮靚同喺學生會討論要唔要換廁紙牌子就無其他風浪嘅Elle Woods因此大受打擊。為咗追返男友，決定跟埋佢去讀法律，最後因為著住粉紅三點式嘅自我介紹影片（喂，物化女性！）而成功破例被哈佛法律系取錄！
個人咁離地，上堂就梗係搞唔掂，處處被針對，但憑住要喺男友現任面前「活得比你好」嘅意志，勤力發奮又竟然俾佢追到進度，加上佢思維同其他法律系學生唔同，偶有真知灼見，仲用一顆真心說服到client講真話，又用佢對時裝嘅熱愛，拆穿咗証人係gay、電完髮無可能即刻洗頭嘅不在場証據，成功為客人打甩謀殺案！
法庭審訊過程非常兒戲，以依家準則嚟睇，仲有幾多不合時宜嘅物化女性、典型同性戀者設計，不過當年仲未有咁多政治正確嘅討論，所以被納入愛情喜劇元素都尚可接受。因為《律政俏佳人》大受歡迎，所以2003年再下一城拍埋續集！
事隔17年有多，《律政俏佳人》竟然宣布開拍第3集，Reese Witherspoon演出兼做監製，仲搵嚟近年非常活躍《盜海豪情：8美千嬌》、Netflix劇Never Have I Ever女星Mindy Kaling做編劇。Mindy一向關注女性議題，以往編劇作品多以女性於一片男人嘅職場如何突圍，又或者少女如何不怕他人眼光做自己等等，今次加入為《律政俏佳人3》編劇，應該唔會再玩金髮無腦𠴱套，但無咗呢個設定，20年後嘅Elle Woods會變成個咩人呢？如無意外，應該出年就會知！
更多電影文章
【電影LOL】冇新片好在仲有經典《蝙蝠俠》三部曲、《十二夜》再現大銀幕
【電影LOL】今個星期睇咩戲 《孤城淚》《冰血殺機》《火口的二人》《又要威，又要除頭盔2》
【電影LOL】好啱呢期睇！新片Bad Education踢爆作育英才嘅斯文敗類
