Yahoo奇摩新聞 【電影LOL•外語930】《阿基拉》30年前神預言 東京奧運中止
有傳媒收到風，話因為新型冠狀病毒嘅關係，香港戲院商會將會同商經局開會，商討租金及補償等事項，如果傾得成，全港戲院有機會由星期六（28日）起停業！其實疫情咁嚴峻，就算戲院加強清潔又隔行隔位賣飛，市民為咗防疫決定少出入戲院及其他娛樂場所，連商場都人流大減，再加上有3間戲院因為有確診病人幫襯過，進一步影響觀眾入場意慾。
票房屢創新低，各大院商都極頭痕，停業都係辦法之下嘅辦法。不過如果真係星期六開始停業，最受影響一定係上映30周年而重現大銀幕嘅《阿基拉》！原作大友克洋開始創作漫畫版時，無諗過會有電影版，不過收到邀約時又覺得好有意思，結果喺日本經濟高飛嘅八十年代，以11億日元超高成本監製及創作出神級動畫《阿基拉》！
呢套經典科幻動畫，不但轟動了整個動漫界，無論係鉅細無遺嘅構圖、美學以及意識形態，喺科幻電影史上都有著重量級地位，奠定了日本Cyberpunk的獨特風格，更影響了日後無數電影，包括《廿二世紀殺人網絡》、《潛行兇間》、《蝙蝠俠—黑夜之神》、《新世紀福音戰士》都曾向它致敬。
近日談論最多仲包括《阿基拉》嘅神預言，戲內有2020年東京舉辦奧運嘅描述，但係開幕前147日因為第三次世界大戰而中止。現實中，東京原定於2020年舉辦奧運，不過因為新型冠狀病毒而要延期1年至2021年先舉行！新冠肺炎現於全球肆虐，唔少國家都進入鎖國狀態，何嘗唔係另一種世界大戰？
1988年東京淹沒於離奇爆炸之中，人類捲土重來，重建超現代城市。怎料三十一年後的新東京卻像一個末世廢墟，頹喪、空洞、委靡。飆車黨大佬和孱弱的同輩意外捲入政府的陰謀之中，災難背後的詭計顯露無遺。片中描述2020年的東京奧運和中止風波，與當今情況不謀而合。寫實的風格道出了繁華都市中崩塌的秩序、腐敗政權下市民的反抗、貪婪混亂裡人性的脆弱… …而亂世中唯一的救贖似乎只剩下「阿基拉」— 一個能重建「光明與希望」的強大力量。
電影仲有唔少隱喻，好似經常出現嘅紅藍藥丸圖案，可以解讀成濫藥亦可以睇成「人性」與「權力慾望」嘅對弈，不論時空仍然係人類要面對嘅問題。正因為《阿基拉》咁經典，所以成為唯一逆市奇葩，預售一出即時秒殺，接近9成爆滿！相信有部份觀眾礙於疫情最後選擇唔出席，不過相信仲有唔少die hard fans會做好安全措施，準備於大銀幕觀賞神作《阿基拉》！
如果戲院真係要停業，希望套戲可以改期再上映啦！
更多電影文章
【電影LOL】今個星期睇咩戲！ 《無痛斷捨離》《喋血戰士》《乾杯！清酒女流》
