【電影LOL.外語930】逃亡教學指南 《Argo救參任務》

呢期好多人討論走唔走,今日講一套關於「走」嘅電影。

1979年,美國駐伊朗大使館俾當地革命衛隊佔據,職員成為人質。其中6個人成功逃到加拿大大使府但未能離開,足足滯留2個幾月。美國中情局被委派到當地救人脫離險境,咁伊朗就梗係搵人睇到實架啦。參與行動嘅特務人員Tony Mendez 諗出一條可以掩人耳目、將人質送出國嘅絕橋︰虛構有加拿大電影公司準備到當地拍攝,6名人質假扮成由加拿大到訪嘅攝影師、服裝指導等幕後人員去睇景,睇完再用假證件走人。因為伊朗開始有懷疑,成個行動分秒必爭。

套戲其實拍得相當商業化,不過係2013年奧斯卡同金球獎最佳電影,少少出人意表,因為同年勁敵有大獎寵兒嘅《林肯》同《少年Pi》,而導演同男主角仲係當時都霉咗好一排嘅Ben Affleck。至於故事,係真有其事,但係情節當然有所出入,例如行動入面「飾演」監製嘅Tony Mendez,實際上喺伊朗只係留咗一日半。而去到結尾,革命衛隊發現成件事係騙局,去到跑道想攔截載住「攝製隊」架機,但係唔成功 - 呢一幕咁緊張刺激,現實中並無發生。

所以Argo成功之處,係將一個不動聲色嘅拯救行動改編到波濤洶湧。如果有起事要走,將Argo當成教材睇,有唔少可以學習嘅地方︰

-事先安排要做足。戲入面Tony Mendez真係準備好晒劇本、文件俾伊朗批,甚至去荷里活搵製作人幫手,搞埋記者會!而每名「電影人」都有一疊身份設定,參與者要背熟。

-營救過程一度被白宮下令停止,Tony Mendez要說服有關官員。活到某個年紀,人嘅去留唔再係自己話事。說服到就說,講唔掂亦唔好停落嚟。

- 未到終點都唔代表安全。真實版Argo嘅其中一位參與者話,即使拎住假護照過到伊朗海關,佢都唔敢鬆一口氣,直至飛機離開伊朗領空,佢同機上好多人先識得笑。

仲有一點,套戲冇講︰扮拍戲呢條橋而家唔work架啦。個市咁差,邊有咁多budget出外景啫!

更多電影文章

【電影LOL】今個星期睇咩戲 《幻愛》《無名勳章》《惡‧迴家》《緣來客運站》《這一刻,想見你》

【電影LOL】《幻愛》 談一場疑幻似真嘅愛情

【電影LOL】天之驕子變過街老鼠 竟然有人想拍《孫楊傳》?

【電影LOL】康城影展有入圍冇獎頒 香港7大導作品《七人樂隊》入選