Yahoo奇摩新聞 【電影LOL】台灣文化局出post明抽廣電局新指引 呢套台片一定犯晒規
早兩日同大家分享過網路「盛傳」嘅《中國廣電局新增的20條指引》。如果指引成真，真係考起編劇，因為講明愛情劇唔可以太甜、青春劇避免早戀及校園暴力、同性戀要改拍成友誼萬歲、穿越劇又要有科學根據同要正能量等等，總之多多限制！
台灣文化局面書專頁嘅小編就好快手出post回應，逐條對應對岸「青春劇沒了早戀可能成為壯年劇」、「愛情劇的甜度，參考編劇愛喝的那間珍珠奶茶」、「美化軍閥和中化香港哪個嚴重」、「多元性取向的友情、愛情、親情、無情各種題材盡情發揮」等等，講明台灣創作無限制！
除咗電影、劇集創作自由外，相信香港唔少Marketing人、編輯都好羨慕，文化部作為官方機構可以喺面書暢所欲言，唔駛出個post都要自我審查，連香港當下發生緊嘅事都唔可以講，正因為創作自由，所以台灣仲有純本土作品，兼夠搞個頒獎禮！
早前舉辦嘅【第22屆台北電影獎】，其中香港都有上映嘅《返校》、《下半場》成為大贏家，獲得最佳女主角、百萬首獎、最佳攝影等獎項，而最佳男主角就由莫子儀憑《親愛的房客》奪得。
如果根據廣電局標準，《親愛的房客》未必拍得成—雖然講親情，但同時又講同性婚姻，夾硬變做友情？成個故事就講唔通！電影講述林健一（莫子儀 飾）不只看護生病的房東周秀玉（陳淑芳 飾），還收養她9歲的孫子王悠宇（白潤音 飾）。他的行為看似超出普通房客，但其實這都是他思念一個人的方式。然而在周秀玉過世之後，他的動機開始受到質疑。在檢警調查之下，發現越來越多對健一不利的證據……
電影開頭林健一只係周秀玉頂樓租客，同王悠宇互動似足父子，連老師問起，王悠宇都以「我爸」回應，林仲照顧埋周秀玉起居飲食，不過過年食飯、拜神又唔會預林健一，因為周秀玉知道呢位房客其實係佢意外死去兒子嘅同志伴侶，雖然有林健一嘅照顧，卻又未能對兒子係同性戀釋懷。
電影描述同志伴侶於社會嘅困境，林健一領養王悠宇時，面對檢察官對佢身份嘅質疑「如果我係女的，我丈夫過世，我繼續照顧佢家人，你還會問同一問題嗎？」道出同志成家嘅辛酸。
《親愛的房客》係鄭有傑導演最新作品，單睇預告片已經眼濕濕，莫子儀出道20年，一向有演技，仲幾次提名最佳男主角，今次終於憑「將自身投入角色之中，深刻融入角色生命歷程，情緒豐富飽滿，令人動容」於台北電影節稱帝。電影將於10月台灣上映。
更多電影文章
【電影LOL．退票安排】戲院再次停業 一文睇晒各大院線退票安排
【電影LOL】網傳內地廣電局又有劇本新指引 歷年來有邊啲規矩得啖笑？
