法國疫情失控 康城影展改期 參展片難創《上流寄生族》奇蹟？

上星期康城影展代表就取消今年活動一事出嚟澄清過，可惜新型冠狀病毒疫情告急，法國確診個案不斷攀升，全國進入鎖國狀態，市民除咗買食物、做運動同返工之外，一律禁止外出。面對惡劣情況，原定於5月12日至23日舉行嘅康城影展不得不宣佈延期舉行。由於無法估計疫情發展，到底改到幾時仲係未知之數。

康城影展已經舉行過第72屆，於國際影壇有舉足輕重地位，對觀眾嚟講，最關注當然係有咩巨星出席。近年香港觀眾仲搵多一個娛樂元素，就係睇下有咩叫唔出名，唔知佢係邊個，連演藝人員都算唔上嘅大媽類物體，身穿奇裝異服甚或壞品味衣裝，喺紅地毯趕極唔走搏曝光，騎呢程度一年比一年嚴重！

不過影展對電影人嚟講有多一層意義，特別對獨立影人嚟講，康城影展集合全球電影公司代表、監制、買手等，係絕佳推銷作品嘅場合，仲係賣出發行權嘅好時機。好作品如果無公司買版權，變相無人睇到亦無利可圖，血本無歸自然無下一套作品！

康城影展設有評審競賽項目，今年美國導演Spike Lee更被選為影展評審團主席，係影展73屆以來首次由黑人擔任評審主席一職，今屆賽果因此更受注目。而康城影展評審結果，以至參展作品影評，往往影響之後舉辦嘅、例如9月威尼斯國際影展及多倫多國際影展。幾個國際影展嘅好評往往又影響到金球獎、奧斯卡嘅賽果，可謂掀一髮動全身。韓片《上流寄生族》就係好例子，佢喺國際影展贏得多個殊榮，最後仲袋埋奧斯卡落袋添！

知情人士透露康城影展寄望延至6月底舉行，不過唔少影人就話唔敢出席，因為放映場所可以容納2000人，戴2個口罩都唔放心咁話！再往後推又會撞正威尼斯同多倫多影展，而疫情相當嚴重嘅威尼斯影展就堅持活動如常於9月2至12日舉行！可惜無人預測到幾時雨過天清，面對疫情，相信各大影展主辦單位、電影公司都束手無策，只可以等！

雖然展期未定，不過影展繼續接受報名。今日唔知聽日事，影展隨時變陣換個玩法都唔奇，各大電影從業人唯有睇餸食飯，靈活應對啦！