Yahoo奇摩新聞 【電影LOL】畢彼特新片 華裔女星爭演荷里活傳奇女星黃柳霜
畢彼特年頭憑昆頓塔倫天奴執導嘅《從前，有個荷里活》橫掃各大頒獎禮最佳男配角，連奧斯卡都攞埋！小休一陣，畢彼特再次接拍新作品，參演新片Babylon。故事內容有幾分似《從前，有個荷里活》，一樣向特定年代嘅光影世界致敬，睇埋Babylon台前幕後組合，電影公司野心勃勃，以掃獎為目標！
Babylon故事以1920年代中後期嘅荷里活為背景，當時電影由默片開始進入有聲電影時代，故事講述一眾行內人如何面對轉變，當中有真實人物亦有虛構角色，個設定係咪似20年代版本嘅《從前，有個荷里活》呢？電影將由榮獲奧斯卡6項大獎嘅《星聲夢裡人》(La La Land)導演Damien Chazelle撰寫及執導。
導演仲搵返憑《星聲夢裡人》榮登影后嘅Emma Stone再次合作，將會飾演影星Clara Bow，佢喺默片年代已經走紅，之後又成功過渡到有聲電影，因為電影It嘅角色大紅，仲因此多咗個’It girl’嘅朵，到今時今日英文仍然以’It girl’形容當紅、受矚目嘅潮女子，影響力深遠！
而畢彼特將會飾演虛構嘅默片明星。同Clara Bow不同，畢佬個角色未能與時並進過渡到有聲電影，以至星途暗淡，據講角色以默片明星John Gilbert為原型創作。Babylon仲有其他強勁cast，梅麗史翠普飾演英國劇作家Eilnor Glyn，第一代蜘蛛俠Tobey Maguire會飾演荷里活監制Irving Thalberg，仲有《黑豹》男星Michael B Jordan則會飾演以Louis Amstrong為原型嘅音樂人。
不過以上一眾大星都唔係Babylon嘅主角，劇組仲搵緊男演員飾演故事主人翁，一個廿歲出頭到荷里活尋夢嘅拉丁裔移民後代。而另一個戲份頗重嘅角色，係荷里活首位華人女星黃柳霜（Anna May Wong），佢參演過多部默片，喺Babylon佔重戲份都合理，至於由咩人飾演黃柳霜就未公布。
睇返演員招募要求，講明想搵三十至四十歲、唱到歌嘅女演員，飾演身為紅星卻依然飽受種族歧視之苦嘅黃柳霜。睇勻現今荷里活，華裔演員有限，啱數嘅好似得《我的超豪男友》Constance Wu同Gemma Chan，又或者會好似《花木蘭》咁cast中國內地女星？照睇以移民後代、黃柳霜為主角，Babylon一定會觸及種族議題，怕且好多玻璃心會話黃柳霜矮化中國人形象，邊個女星可以接拍而唔驚負評？應該個後台要夠硬先得！
更多電影文章
【電影LOL．地道本周影院】20年後一樣塞 《屯門睡的文化》
【電影LOL】今個星期睇咩戲《金都》《睇你幾時死》《嚇鬼女朋友》《人工戀愛情式》
【電影LOL】事業愛情皆得意 奇洛李維斯轉性拍喜劇演騎呢中坑band友
