【台語世界/錄音】Ná行ná寫詩

2017年2月初6(咱人正月初九),早時8點40分出發,chit二日ê目的地是苗栗縣kah新竹縣,chit二ê行政區是客家ê大本營,雖罔以前bat來過,m̄-koh對chit-ê所在無特別ê斟酌,chit擺是因為舊曆年假期已經結束、較bē that車,歇寒到最後ê坎站、teh-beh開學ah,才來一chōa深度ê旅遊。Chit二工攏總去十ê所在,每一站攏用一首詩kā伊記錄起來,請ta̍k家做伙來欣賞。

第一站:泰安火車頭
離別ê月台、火車無閣來
泰安失光彩、鬱卒真悲哀
上帝好安排、新人起舞台
愛情真豐沛、祝恁好將來

第二站:勝興火車頭
徛佇山頂ê勝興、山線火車無閣停
世人放拺真悲情、hō͘人感覺心真凝
火車無來漸平靜、轉型觀光展功能
遊客人額日日昇、再造山城ê繁榮

第三站:龍騰斷橋
龍騰村內有斷橋、庄內人口嘛真少
遊客聞名來chia歇、chia是榮耀ê地標
龍騰斷橋有特色、雖罔地動來衝擊
橋墩徛tiâu tī苗栗、ta̍k家惜我若寶玉

第四站:功維敘磅空
磅空磅空真神奇、五彩燈光變把戲
山線火車舊地址、再造風華ê印記
磅空內底水teh滴、散步ê時愛細膩
磅空地點真bih-sih、出洞光明一片天

第五站:明德水庫
明德水庫真迷人、遊湖美景無地藏
坐船消遙真輕鬆、情人歡喜來出帆
相約水庫坐渡輪、快樂船隻欲出巡
培養感情趁這陣、心花當開來行春

第六站:合興火車頭
合興車頭有氣氛、雙人枕頭真溫純
愛情道路欲平順、追求火車愛慇勤
渴望愛情來合興、二人海誓閣山盟
青年男女chia定情、將來婚姻一定成


合興車站位於新竹縣橫山鄉,為臺灣鐵路管理局內灣線的鐵路車站。圖/擷自維基百科,公有領域
第七站:內灣山城
內灣老街古早物、hō͘阮懷念囡仔時
糖仔四秀佮麻糬、來chia保證真滿意
內灣車頭tī內山、有你陪伴bē孤單
來到內彎m̄通趕、沿路景色慢慢看
內灣戲園有古味、這馬已經無搬戲
重新出發chia徛起、鴻圖大展得天時
內灣吊橋真奢iāⁿ、傳遍台灣有名聲
有閒請你來chia行、保你清爽閣勇健

第八站:好望角
好望角tī半天寮、ǹg南看去是通霄
風透險險徛bē tiâu、視線清楚地形妙
今生有緣徛tī-chia、消遙自在伴風車
有我行過ê痕跡、性命歌詩我來寫

第九站:新埔車頭
台灣海峽tī門口、上蓋倚海火車頭
東西南北行透透、新埔千萬m̄通漏
黃昏美景報你知、觀看日頭沉落海
站前駁岸等你來、欣賞夕陽ê光彩


新埔車站。圖/擷自維基百科,公有領域
第十站:秋茂園
通霄新埔秋茂園、起tī海邊ê田庄
秋茂先生有擔當、回報鄉親kah地方
園區恬靜來散步、咱愛好好學秋茂
別人需要咱幫助、對待弱勢愛照顧

台灣字(白話字)版
Ná kiâⁿ ná siá-si

2017 nî 2 goe̍h chhe 6(lán-lâng chiaⁿ--goe̍h chhe-káu), chá-sî 8 tiám 40 hun chhut-hoat, chit nn̄g-ji̍t ê bo̍k-tek-tē sī Biâu-le̍k-koān kah Sin-tek-koān. Chit nn̄g ê hêng-chèng-khu sī Kheh-ka ê tōa-pún-iâⁿ, sui-bóng í-chêng bat lâi--kòe, m̄-koh tùi chit-ê só͘-chāi bô tek-pia̍t ê chim-chiok, chit-pái sī in-ūi kū-le̍k-nî kà-kî í-keng kiat-sok, khah bē that-chhia, hioh-joa̍h kàu chòe-āu ê khám-chām, teh-beh khai-ha̍k ah, chiah lâi chi̍t-chōa chhim-tō͘ ê lú-iû. Chit nn̄g-kang lóng-chóng khì cha̍p ê só͘-chāi, múi chi̍t-chām lóng ēng chi̍t-siú si kā i kì-lo̍k khí-lâi, chhiáⁿ ta̍k-ke chò-hóe lâi him-sióng.

Tē-it chām:Thài-an hóe-chhia-thâu
Lî-pia̍t ê goe̍h-tâi, hóe-chhia bô koh-lâi.
Thài-an sit kong-chhái, ut-chut chin pi-ai.
Siōng-tè hó an-pâi, sin-lâng khí bú-tâi.
Ài-chêng chin phong-phài, chiok lín hó chiong-lâi.

Tē-jī chām:Sèng-heng hóe-chhia-thâu
Khiā tī soaⁿ-téng ê Sèng-heng, soaⁿ-sòaⁿ hóe-chhia bô koh thêng.
Sè-jîn pàng-sak chin pi-chêng, hō͘ lâng kám-kak sim chin gêng.
Hóe-chhia bô lâi chiām pêng-chēng, choán-hêng koan-kong tián kong-lêng.
Iû-kheh lâng-gia̍h ji̍t-ji̍t seng, chài-chō soaⁿ-siâⁿ ê hoân-êng.

Tē-saⁿ chām:Liông-têng tn̄g-kiô
Liông-têng chhoan-lāi ū tn̄g-kiô, chng-lāi jîn-kháu mā chin-chió.
Iû-kheh bûn-bêng lâi chia hioh, chia sī êng-iāu ê tē-pio.
Liông-têng tn̄g-kiô ū te̍k-sek, sui-bóng tē-tāng lâi chhiong-kek.
Kiô-tun khiā tiâu tī Biâu-le̍k, ta̍k-ke sioh góa ná pó-ge̍k.

Tē-sì chām:Kong-î-siok pōng-khang
Pōng-khang pōng-khang chin sîn-kî, ngó͘-chhái teng-kng piàn pá-hì.
Soaⁿ-sòaⁿ hóe-chhia kū tē-chí, chài-chō hong-hôa ê ìn-kì.
Pōng-khang lāi-té chúi teh tih, sàn-pō͘ ê sî ài sè-jī.
Pōng-khang tē-tiám chin bih-sih, chhut-tōng kong-bêng chi̍t-phiàn-thiⁿ.

Tē-gō͘ chām:Bêng-tek-chúi-khò͘
Bêng-tek-chúi-khò͘ chin bê-lâng, iû-ô͘ bí-kéng bô-tè chhàng.
Chē-chûn siau-iâu chin khin-sang, chêng-jîn hoaⁿ-hí lâi chhut-phâng.
Siong-iok chúi-khò͘ chē tō͘-lûn, khoài-lo̍k chûn-chiah beh chhut-sûn.
Pôe-ióng kám-chêng thàn chit-chūn, sim-hoe tng-khui lâi kiâⁿ-chhun.

Tē-la̍k chām:Ha̍p-heng hóe-chhia-thâu
Ha̍p-heng chhia-thâu ū khì-hun, siang-lâng chím-thâu chin un-sûn.
Ài-chêng tō-lō͘ beh pêng-sūn, tui-kiû hóe-chhia ài un-khûn.
Khat-bōng ài-chêng lâi Ha̍p-heng, nn̄g-lâng hái-sè koh san-bêng.
Chheng-liân lâm-lú chia tēng-chêng, chiong-lâi hun-in it-tēng sêng.

Tē-chhit chām:Lāi-oan soaⁿ-siâⁿ
Lāi-oan lāu-ke kó͘-chá-mi̍h, hō͘ goán hoâi-liām gín-á sî.
Thn̂g-á sì-siù kah môa-chî, lâi chia pó-chèng chin boán-ì.
Lāi-oan chhia-thâu tī lāi-soaⁿ, ū lí pôe-phōaⁿ bē ko͘-toaⁿ.
Lâi kàu Lāi-oan m̄-thang kóaⁿ, iân-lō͘ kéng-sek bān-bān khòaⁿ.
Lāi-oan hì-hn̂g ū kó͘-bī, chit-má í-keng bô poaⁿ-hì.
Têng-sin chhut-hoat chia khiā-khí, hông-tô͘ tāi-tián tit thian-sî.
Lāi-oan tiàu-kiô chin chhia-iāⁿ, thoân-piàn Tâi-oân ū miâ-siaⁿ.
Ū-êng chhiáⁿ lí lâi chia kiâⁿ, pó lí chheng-sóng koh ióng-kiāⁿ.

Tē-peh chām:Hó-bōng-kak
Hó-bōng-kak tī Pòaⁿ-thiⁿ-liâu, ǹg lâm khòaⁿ-khì sī Thong-siau.
Hong thàu hiám-hiám khiā-bē-tiâu, sī-sòaⁿ chheng-chhó tē-hêng biāu.
Kim-seng ū-iân khiā tī-chia, siau-iâu chū-chāi phōaⁿ hong-chhia.
Ū góa kiâⁿ--kòe ê hûn-jiah, sèⁿ-miā koa-si góa lâi siá.

Tē-káu chām:Sin-po͘-chhia-thâu
Tâi-oân-hái-kiap tī mn̂g-kháu, siōng-kài óa-hái hóe-chhia-thâu.
Tang-sai lâm-pak kiâⁿ-thàu-thàu, Sin-po͘ chhian-bān m̄-thang lāu.
Hông-hun bí-kéng pò lí chai, koan-khòaⁿ ji̍t-thâu tîm lo̍h-hái.
Chām-chêng poh-hōaⁿ tán lí lâi, him-sióng se̍k-iông ê kong-chhái.

Tē-cha̍p chām:Chhiu-bō͘-hn̂g
Thong-siau Sin-po͘ Chhiu-bō͘-hn̂g, khí tī hái-piⁿ ê chhân-chng.
Chhiu-bō͘ sian-siⁿ ū tam-tng, hôe-pò hiong-chhin kah tē-hng.
Hn̂g-khu tiām-chēng lâi sàn-pō͘, lán ài hó-hó o̍h Chhiu-bō͘.
Pa̍t-lâng su-iàu lán pang-chō͘, tùi-thāi jio̍k-sè ài chiàu-kò͘.

讀hōo你聽:


文章屬作者個人意見,文責歸屬作者,本報提供意見交流平台,不代表本報立場。