[Newtalk新聞] 我讀冊的時,是 95 暫綱這屆。高中學號照入學民國年落去編,逐家制服胸坎橐袋仔懸頂,頭一碼攏繡 5。這字 5 本身無啥特別的,毋過對阮這屆開始,高中就無閣上「三民主義」,改做「公民課」。阮的公民老師原底教三民主義,轉過來教公民。伊教了袂䆀,共法律講甲誠清楚。一半擺仔,公民老師講起較早聯考,有咧考三民主義,敢若咧懷念彼時的風光。彼當陣,歷史課有咧教二二八佮白色恐怖。白色恐怖課本有寫政策、體制、大代誌,寫彼時無言論自由...